Basha: Fjalimi i Ramës nxit urrejtjen ndaj gazetarëve

Lulzim Basha ka reaguar në lidhje me fjalimin e mbajtur nga Kryeministri Edi Rama në ditën ndërkombëtare të medias.

Kryetari i PD-së e quan kriminal fjalimin e Ramës dhe thotë se fjalime të tilla nxisin përditë urrejtjen ndaj gazetarëve.

Postimi i plotë i Bashës në Facebook:

Fjalimi i djeshëm i Edi Ramës kundër gazetarëve është fjalim kriminal. Me fjalime të tilla, ai është duke nxitur për ditë urrejtjen dhe dhunën ndaj gazetarëve. Gazetarët janë ndër njerëzit më të rrezikuar në botë, shënjestër e shpeshtë e krimit dhe e politikanëve të korruptuar. Vetëm pak ditë më parë në Maltë u vra në mënyrë barbare një gazetare që hetonte kryeministrin.

Klima që krijon Edi Rama inkurajon pikërisht kriminelët që të sulmojnë gazetarët që raportojnë dhe hetojnë krimin dhe korrupsionin. Njeriu që ka thurur vetëm lavde dhe përkëdheli për Elvis Roshin, Saimir Tahirin dhe kriminelët e tjerë më të cilët rrethohet, duhet të ndalë menjëherë gjuhën e tij të rrezikshme.

Ju bëj thirrje të gjithë qytetarëve, intelektualëve, gazetarëve dhe politikanëve ta denoncojnë dhe të mos heshtin përballë kësaj sjellje kriminale të kryeministrit. U bëj thirrje organizatave ndërkombëtare dhe partnerëve të huaj që të dënojnë këtë gjuhë urrejtje dhe të dhunshme të kryeministrit.

Lexo edhe:  Nishani nderon heroizmin e ushtarëve britanikë në Ditën e Kujtesës