Piloti që bombardoi Serbinë më 1999 nderohet me “Urdhrin e Lirisë”

Shefi i Shtabit të Forcave Ajrore të ShBA-së që ishte pilot gjatë bombardimeve të NATO-s është dekoruar me “Urdhrin e Lirisë”.

Komandanti i FSK-së Rrahman Rama në emër të Presidentit Hashim Thaçi dekoroi me “Urdhrin e Lirisë” shefin e shtabit të Forcave Ajrore të ShBA-së David Goldfein.

Sipas një njoftimi të Ministrisë së FSK-së gjenerali Rama “falënderoi gjeneralin Goldfein për sakrificën e tij në mbrojtje të vlerave demokratike dhe humane gjatë luftës së fundit në Kosovë”.

Rama më tutje ka thënë se “populli i Kosovës do t’i jetë mirënjohës përgjithmonë popullit dhe Ushtrisë Amerikane”.

Tash gjenerali Goldfein, ishte pilot që kishte marrë pjesë në bombardimet e NATO-s gjatë luftës në Kosovë.

Ai i pati mbijetuar rrëzimit të aeroplanit luftarak i cili ishte goditur nga Ushtria e ish-Jugosllavisë( Federata Serbi-Mali i Zi) gjatë fushatës së NATO-s në vitin 1999.

Sipas njoftimit të MFSK-së gjeneralët Rama e Goldfein biseduan për nevojën e bashkëpunimit në të ardhmen, krijimin e mundësive për pjesëmarrje të kadetëve të FSK-së në Akademinë e Forcave Ajrore Amerikane, trajnimet kibernetike si dhe për fushat tjera me rëndësi për FSK- në.

Lexo edhe:  Haziri: LDK dhe Vetëvendosje kanë shumë të përbashkëta

Në takim mes dy gjeneralëve morën pjesë edhe komandanti i Gardës Kombëtare të Ajovës, gjeneral Timothy Orr, atasheu amerikan i Mbrojtjes në Kosovë, koloneli Jeffry Fischer dhe atasheu i Kosovës në Uashington, kolonel Ilir Qeriqi.